No kan du få med deg den interaktive utstillinga «Jakta på sanninga» på Askøy folkebibliotek. Dette er ei interaktiv utstilling om dagens informasjonssamfunn, val og påverknad.
I dag fortel informasjonsstraumen oss alt frå kva vi skal eta, til kva parti vi bør stemma på. Men kan vi eigentleg stola på alt vi ser, høyrer og les? Og korleis kan vi vera sikre på at vi baserer vala våre på sann informasjon? Korleis kan vi navigere i ein informasjonsstraum som er prega av algoritmar, kunstig intelligens og avsendarar som ønsker å påverke oss? I utstillinga møter du ein samtalebot som trenar deg opp til å bli din eigen faktasjekkar. Du får testa korleis informasjonslandskapet verkar gjennom algoritmar, appar, influensarar, kunstig intelligens, og ikkje minst politiske aktørar med ein eigen agenda. Med konkrete døme frå ein digital kvardag skal utstillinga bidra til å styrke den kjeldekritiske kompetansen og mediebevisstheita blant unge og vaksne i dagens informasjonssamfunn.
«Jakta på sanninga» er utvikla av Bergen Offentlige Bibliotek i samarbeid med Tenk, som er skuleavdelinga til Faktisk.no. Bibliotekutvikling Vestland har fått midlar frå Nasjonalbiblioteket til å senda «Jakta på sanninga» på turné i fylket.
Utstillinga er tilgjengeleg for alle, men ho er særleg tilpassa ungdom.
Tekst: Øygardsbiblioteka
Foto: Askøy folkebibliotek
